Exodus 16
Israel dabe augwaligo tuabo nai mana me, ba me sai
1Te Israel hani te Isip taga soalama, tama pelama, tama te bulu Elim tede osogo bidali. Tama te Isip taga soalama, tama polua deli silama, te polua dei 15, te side tigidali Israel hani we bidigo te Elim bulu tagalama, tama te tǫ wa pai nai meni yai bulu nogi Sen tomoba pai. Te bulu te Elim de Sainai te bulu si tomode elaluai. 2Tama augwaligo wado po, me te po hauwa te Moses de Aron si dali te bulude wai. 3Augwaligo te bidi si dali te po wai, “Dago homugo Genuai Bidigo da Isipde eligi sogo da, usu igi dao. Polobadu da Isipde bidibadi, mena tiwai nai dabe, me hasa mi me, te dago homugo digi sai dao. Tiali goli, dage sigo da e nai meni yai wa pai buluba odasa asai, tama dage sigo homugo da nai sili bidilama, tama da tigidali isimainogo homu yai. Tama da Isipde bidibadi isigi sogo da, te wiegi yai mu igi dao,” wali.4Tama Genuai Bidigo te po Mosesbolo wai, “Eno te bret dagalude tulalubode te dagego siąo. Tama tigidali deli deli side te we bidi augwali pelama, te side tuabo te nai sigi pao. Te eno augwali te kolesagade usu selama, tama augwaligo eno po wali pogowe, te eno koneainogo tiaibao. a 5Tama te nogo a olama me badu deli te side augwaligo si sogo tuabo nai sisilama, sela muao,” te po wai.
6Tama Moses dali Aron sigo te Israel we bidi hani tigidalibolo te po wai, “Tama pio te dagego bugagia koneagameo, Genuai Bidi aga digi dage Isipdu odasa asai dao. 7Dagego wado po weyu, po hauwa aga dali wali, te agai odalio. Tama tibaso, kigamu te Genuai Bidigo digi aga bomo de ula dali si dagego sueibao. Da si te olo bidi naga dao. Tama magi pode dagego wado po da si dali obawe?” 8Tama Mosesgo po ma wai, “Genuai Bidi aga digi dage te nai mi pio mabode te dagego tuagameo. Tama agai te nai bret kigamu te dagego homugo somainogo mawaibao. Magi basowe, dagego po hauwa aga dali wabo odai. Tiali goli, da si te olo nai tiwai dao. Dagego wado po te Genuai Bidi dali naga obao.”
9Tama Mosesgo Aronbolo te po wai, “Augwalibolo e po pusao, ‘Genuai Bidigo te dage tigidali we bidigo wado po wabo odalio. Tama tibaso, dage tigidali aselama, te Genuai Bidi pąba dolagasao,’ te po wao.”
10Tama Arongo te po augwalibolo wali, tama te sogo agai po odubadi, augwaligo te masigi kemi yai buluba tonono pai, tama polo tama Godigo genuai ula de bomo dali si, te augwali polasa pabo bobage pǫ tedu pedelai.
11Tama Genuai Bidigo Mosesbolo te po wai, 12“Eno te Israel dabe augwaligo wado po wali po odalio. Tama te po augwalibolo wao, te pio mu augwaligo te nai mi tuyu, tama kigamu augwaligo te bret te augwa homugo sela tuao. Augwaligo te nai sela tuyu, tama augwaligo te tiwai koneyu, ena Genuai Bidi Yawe, ena digi ena te augwaligo God da, te augwaligo konemainao,” wali.
13Tama pio dwasianu ba hani hauwa augwali bidibo pesageba pągąna sagasai. Tama me te kigamu te hulide tulubage segeni yali ąį te augwali bidibo pesage nosa pąde elaluai. 14Tama te wę wa paide, augwaligo suali, te dwasianu nai hauwa te tǫde munaluali, te ni yabe dabe pepeda pabo tiwai yai. 15Tama Israel dabe augwaligo te nai suali, tama augwaligo konebeo. Tama augwaligo augwa hasibolo digi hanaluyu, te tiwai po wai, “Te magi nai dawe?” Tama Mosesgo augwalibolo te po wai, “Te bret Genuai Bidigo digi dagego tuabo nai mobao. b 16Tama Genuai Bidigo tama po wai, ‘Dage deli deligo duga we wai dabe dali usu sisinao. Dagego te lita si sabo sene deli delide te duga ugwa bede bidibo we bidi wai puluba usu nama sao,’ wali.”
17Tama Israel dabe augwaligo tama tiwai, tiali goli mebago hauwa sali, tama mebago dwasianu naga sai. 18Tama augwaligo te nai dagala subo sogo, te nai hauwa sali bidi dabego, te sene usu menio. Tama te dwasianu naga sali bidi dabego, te augwaligo nai habuge ebeo. Tama tigidaligo te nai tulama, tama augwali tabi pągąnama, tama augwali nasi me ebeo. c
19Tama Mosesgo augwalibolo te po wai, “Dagego nai meba te do tuaiba olama, me munamo dao.” 20Tiali goli, mebago Mosesgo po odisiąma, wali pabe, tama augwaligo nai meba nosali side tuainogo muai. Tiali goli, kigamu dwasianu kigi dabe te naiba pągąna selama, tama kugumini dwai pedelai. Tama Mosesgo augwali dali wado yai.
21Tama te we bidi augwaligo tigidali sogo kigamu te nai augwa sabo usu tama sai. Tama giliga nanobo sogode, te sisąma tǫde munaluali nai, te wę tiwai pedelama, odolali sia sai. 22Tama te namba 6 dei augwaligo nai si sogo tuabo usu siyu, te dwasianu sene si te deli deli bidi usu nama sai. Tama Israel tobolu bidi dabe aselama, Mosesbolo te sę yali po wagasai. 23Tama Mosesgo augwalibolo te po wai, “Genuai Bidigo te po wai, do te olo bidibo side dao. Te Sabat side, tama te Genuai Bidigo olo bidibo side. Tama megi te dagego nai meba siade ulai wida, teda dagego uluiąo, tama meba te dagego sene ulainogo wida, teda te sene ulao. Tama te me badu munalubaso da, teda te do ulabo munalumainao,” te po wai. d
24Tama augwaligo Mosesgo po wali pelama, te sogo nai meba ula tuali, tama augwaligo ulusiąwani nai meba te nosali side ulainogo muai. Tama do kigamu augwaligo suai, te nai damua pisąma, tama dwasianu kigi dabe me pedalobeo. 25Tama te side Mosesgo te po wai, “Megi te Sabat side, te side olo bidiyu, genuai nogi Genuai Bidibolo mabode, tama megi dagego nai te dage bidibo pesage tǫde me gegegobeo. Tama dagego te do munaluali tubo nai megi tuagameo. 26Tama te tigidali Sarere te a naga olama me deli tede, dagego te nai saibao. Tama a naga olama me badu nogo si, te side te olo bidibo side, tama te side te tǫde nai me munalugobeo,” wali.
27Tama agai te po wai goli, te nogo a olama me badu si te olo bidibo Sabat side te we bidi meba nai sigi peyu pai, tiali goli augwali odolali gegai. Nai me munalubeo. 28Tama Genuai Bidigo Mosesbolo te po wai, “Nisu sogo dagego te dwai kolesaga ebo tagalama, tama dagego eno bomo yai po wali paibawe? 29Bugagia odao, Genuai Bidi eno dagebolo te olo bidabo side te mobao. Tama tibaso, te dwasianu Sarere eno dagebolo eno te deli sogode te si sogo tuabo nai mawaibao. Tama, te nogo a naga olama nogo me si wabo side tigidali we bidi te ugwa bede bidiąo. Te bidi me deligo me, te wego me, te aga bidibo obo bolama, te buluba me pelamo dao.” 30Tama te po obaso, nosali augwali te a naga olama me badu nogo si te side olo bidai.
31Tama Israel we bidi augwaligo te tǫ daide sali nai nogi mana wai. ▼ Te nai mana dwasianu ge tedela yai, te nedu du me deli tiwai. Tama te nai pusu, te bisket hani mege dali gelama nigai tubo pusu tiwai yai. f 32Tama Mosesgo augwalibolo te po wai, “Genuai Bidigo te po wai, dago te tǫgo nigai dwasianu sene selama, te nai mana tede munama, te dago wąį te wai dabe augwalide muao. Nosali augwaligo te Genuai Bidigo da te nai meni yai bulude mani nai sumainu, te agai da Isip tagalama odasa asai dao,” wali.
33Tama Mosesgo te po Aronbolo wai, “Te tǫgo nigai sene me deli selama, tede te nai mana pągąnama, tama te sene te Genuai Bidigo gedude muao, tama te nosali ame nabo hani wai dabe augwaligo te sulama, konemainao.” g
34Tama Arongo te mana muani sene te bomo yai po munalubo halobage eda badu muani, te Genuai Bidigo Mosesbolo wali po gilama tama tiwai. 35Tama Israel dabe augwaligo te nai mana te kibu be bidi sese side 40 tuai. Tama te kibu be bidi sese si silama, tama nosali augwali te bulu tǫ Kenan teba pedelama, tama augwali te tǫde bidiyu, gi sę yai. h 36(Tama te mana nai senede muani sogo, augwaligo sene gasa tobage tiwai si elaluai. Te me sene deli te dwasianu usu tama, tama gasa te dwasianu sene nogo si usu yabo tiwai elaluai. Tama Arongo te tobage dwasianu sene te nai mana pągąnama, te Genuai Bidigo gedude muani.)
Copyright information for
MPS